Plantun de Prouvènço

Pèr coumpara dos planto d'encò nostre

Bupleurum rigidum & Scleranthus annuus

Bupleurum rigidum

Apiaceae Umbelliferae

Noms en français : Buplèvre raide, Oreille-de-lièvre.

Descripcioun :
L'auriho-de-lèbre es uno planto coumuno que trachis souto lis éuse e dins la garrigo de colo. Flouris l'estiéu, la planto èi drecho e seco, se recounèis à si lònguis fueio que dounon d'èr à d'auriho, èi verai, de lèbre. Coume tóuti li Bupleurum fai de pichòti flour jauno.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 0,3 à 0,6 m
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Bupleurum
Famiho : Apiaceae
Famiho classico : Umbelliferae

Ordre : Apiales

Coulour de la flour : Jauno
Petalo : 5
Ø (o loungour) flour : 3 mm
Flourido : Estiéu - Autouno

Sòu : Ca
Autour basso e auto : 0 à 600 m
Aparado : Noun

Liò : Garrigo - Tepiero seco - Colo
Estànci : Mesoumediterran à Subremediterran
Couroulougi : Estenoumediterran
Ref. sc. : Bupleurum rigidum L., 1753

Gnavello(-de-l'an)

Scleranthus annuus

Caryophyllaceae

Nom en français : Gnavelle annuelle.

Descripcioun :
Aquelo planto, proun ramificado, se tirasso sus la sablo e lis endré trepeja. Sus si tijo se podon vèire uno à dos bando de péu crespu. Li fueio soun redo e en long. Li flour, verdo, soun pas bèn grosso e fan d'enflourejado agroumelado. La subsp. presentado eici, emé de flour gaire duberto e que trachis dins li mitan primàri, ié dison polycarpos. Coumpara emé la gnavello-renadivo.

Usanço :
Fai partido dóu group (38 meno) de flour dicho "de Bach". Ramenten que lou mege, Dr Edward Bach (1886-1936), adoubè de poutingo de flour que dèvon "armounisa l'equilibre epsichique de la persouno". La gnavello permetrié de prendre de decisioun. En Poulougno, au siècle passa s'acampavo li babo de vermèu (Coccus Polonicus) que reston sus li racino pèr n'en faire un coulourant rouge.